ISekhukhune United ikhusela uMogaila kubagxeki
ISekhukhune United ikhusele umdlali wayo uShaune Mogaila kubagxeki emva kokuba esanda kubuyela ebaleni phakathi kwezityholo ajongene nazo kulandela ingozi yemoto eyasuba umphefumlo womntwana oneminyaka elithoba kunyaka ophelileyo.
Ethetha emva komdlalo, umqeqeshi weSekhukhune, uLehlohonolo Seema, usikhusele isigqibo sokuvumela uMogaila abuyele kwiqela. “Ndicinga ukuba iqela ukusukela kusuku lokuqala lwesi sehlo sibi, libonise inkxaso kuShaune nakwiintsapho ezibandakanyekayo, kwaye uShaune wanikwa ixesha lokuhoya nantoni na ebekufanele ukuba uyayenze,” utshilo uSeema.
“Ngokwabucala, zombini iintsapho, uShaune kunye neqela, bazama ukusebenzisana. Bazama ukuqonda kwaye bafune omnye nomnye. Oku kuhle kuba akunyanzelekanga ukuba kumajelo osasazo rhoqo xa iintsapho zidibana,” utshilo.
Uqhube wathi, “Bayaqonda ukuba yayiyingozi. Yinto ebinokwenzeka nakubani na. Ikwabonisa usapho – ndithembe abazange balibale – kodwa bazama ukuxolela.
“Bathi ixesha liyaphilisa kungoko lo mfana ekwazi ukuza ebaleni adlale kuba esazi ukuba usapho lwathi, ‘Ubomi bakho akumele bume. Siyayazi into eyenzekileyo kwaye makhe sibone ukuba iza kuhamba njani.’ Ngenene usapho luyasixhasa kwaye siyayibulela.”
Ukanti, isithethi sosapho lomntwana oswelekileyo, uS’fiso Skhosana, ethetha nesikhululo sikanomathotholo ukukhabile ukuba usapho luxhasa okanye lunike uMogaila iintsikelelo.
“Sisothukile ziingxelo zokuba sinike iSekhukhune United iintsikelelo zokuba uShaune Mogaila aphinde adlale. Xa ndithetha inyani, asizange sidibane noMogaila okanye usapho lwakhe okanye iSekhukhune United ukusukela kulaa ngozi imasikizi,” utshilo uSkhosana.
Ngenyanga yeDwarha kunyaka ophelileyo, uMogaila wangquzulana nemoto eyayinomama nabantwana ababini, le ngozi yakhokelela ekubhubheni komntwana. Lo mama kunye nomnye umntwana obengummelwane bonzakala ngokumasikizi baza babalekiselwe esibhedlele.
UMogaila wabaleka kwindawo yexhwayelo kodwa kamva wazinikela emapoliseni. Kutyholwa ukuba amapolisa afumana iibhotile zotywala kunye neziyobisi kwimoto kaMogaila emva kwale ngozi.
Ubekwe ityala lokuqhuba ngokungakhathali, ukubaleka kwindawo yengozi, kunye nokubulala ngokungenhloso. Ukhutshwe ngebheyile yeR20 000.
UMogaila usandul’ ukudlala kumdlalo weBetway Premiership apho afake khona igowuli edlala neChippa United nalapho eqinisekise ukuba iqela lakhe liyaphumelela kwaye wangqinwa njengomdlali obalaseleyo kulo mdlalo. Umfanekiso ofakwe kwikhasi leSekhukhune ivuyisana naye ngempumelelo yakhe yenza abanye abantu bathandabuza isigqibo seqela sokumvumela abuyele kwiqela.
UMogaila uza kuphinda avele kwinkundla kamantyi yaseTembisa ngomhla we19 kuCanzibe 2025.