Umama kaChidimma ukhululwe ngebheyile yeR10 000
Umama kaChidimma Adetshina, uAnabela Rungo, uvele kwinkundla kamantyi eKapa ngoLwesithathu, nalapho anikwe ibheyile yeR10 000. Akavumelekanga ukuba enze isicelo sokuba ngummi osisigxina eMzantsi Afrika.
Umtshutshisi wombuso unike izizathu zokuba kutheni inkundla kufuneka isichase isicelo sakhe sebheyile, phakathi kwezizathu, umtshutshisi uthe ungumphambukeli ongekho mthethweni kwaye usenokuzama ukubaleka alishiye eli loMzantsi Afrika.
Nangona kunjalo, uMantyi uSadiqah Guendouz uthe ukuba uRungo useziseleni okanye akakho kuzo, ubume bakhe njengomphambukeli buya kuhlala bunjalo.
URungo unikwe ibheyile yeR10 000 kodwa ngemiqathango engqongqo. Uza kuhlala evalelwe endlini kwaye uvunyelwe kuphela ukuba alishiye ikhaya lakhe aye kubona amagqwetha akhe.
URungo akavumelekanga ukuba afake isicelo semvume yokuhlala kweli. Akakwazi ukutyelela okanye ukuthumela nabani na kwindlu yozakuzo egameni lakhe. Inkundla iphinde yachaza ukuba amagosa ajongene nabaphambukeli angamtyelela ekhayeni lakhe engaxelelwanga.
Wabanjwa ekuqaleni kwenyanga yoMdumba ngezityholo zobuqhophololo besazisi kunye nokophula umthetho weImmigration Act. URungo ongummi waseMozambique, usebenzise amaxwebhu abiweyo okanye iinkcukacha zowasetyhini waseMzantsi Afrika ukuze azibhalise njengommi.
Ubuzwe bakhe baphakamisa amashiya ngo2024 xa ubuzwe bentombi yakhe bathandabuzwa ngexesha lokuthatha kwakhe inxaxheba kukhuphiswano lukaMiss SA.
Kulindeleke ukuba abuyele enkundleni ngomhla wesibhozo kuCanzibe 2025.