UMNYANGO wezokuBusa ngokuBambisana neziNdaba zoMdabu KwaZulu-Natal, umeme omasipala abahlukene ngoLwesibili ntambama emcimbini obuseGreyville Convention Center, wokuklomelisa abenza kahle esifundazweni.
Umcimbi obuholwa nguMphathiswa uMfundisi uThulasizwe Buthelezi, ububungaza omasipala kuso sonke isifundazwe abakhombise ukusebenza ngokuzinikela ekulethweni kwezidingongqangi. Imiklomelo ibihlelwe ngokwemikhakha ehlukene, okuhlanganisa ukuphatha okuhle, imiphumela yocwaningomabhuku, uhlelo lwentuthuko edidiyelwe olungcono kanye nedolobha/idolobhakazi elihlanzekile kunawo wonke.
Ngokusho komnyango weCogta esifundazweni, lo mcimbi usebenze njengenkundla yokugqamisa inqubo engcono yokusebenza nokugqugquzela bonke omasipala ukuthi baphokophelele amazinga aphezulu ekusebenzeleni imiphakathi yabo, nokugqugquzela indawo ekahle yokutshalwa kwezimali.
Idolobha laseMhlathuze lidle umhlanganiso, lihlomule umklomelo ka-R1,000,000, ukubonga ukusebenza kahle kwalo ekuphathweni komasipala nasekulethweni kwezidingongqangi.
Umasipala waseMhlathuze ukhale wemuka nesigudi ngokubaqwaqwada bonke omasipala baseKZN emcimbini obuhlelwe uKZN Cogta eThekwini ngoLwesibili ebusuku.
Image: KZN Cogta
UMasipala waseMlalazi uklonyeliswe ngo-R500,000 ngokuzuza isicoco sokuba idolobha elihlanzekile kunawo wonke KwaZulu-Natal, ukhombise ukuzinikela ekunakekeleni imvelo nenhlalakahle yomphakathi.
Umasipala waseMlalazi ukhale wemuka nesicoco sokuba ngumasipala ohlanzekile kunabo bonke esifundzweni.
Image: KZN Cogta
Abanye omasipala abathole izindondo yilaba:
Umasipala waseNkosi Langalibalele Dube nawo uthole okuncane emkhakheni wedolobha elihlanzekile
Image: KZN Gov
Umasipala waseJozini uwole izindondo ezahlukene okubalwa kuzo izindondo zegolide ngohlelo olungcono kakhulu lokulawulwa kwezinhlekelele, isu le-LED elingcono kakhulu. Wahlabana ngendo yesiliva ngohlelo olungcono kakhulu lokuthuthukiswa okudidiyelwe (IDP) lwango-2024/2025.Izindondo ezimbili zethusi ngamaphrojekthi eyokuqala ngeyenkundla yezemidlalo yphethwe kakhulu: Makhane Sportfield: nephrojekthi ephethwe kakhulu ngehholo lomphakathi laseManzamnyama:
Image: KZN Gov
Umasipala Wesifunda Ugu uhambe ohambili ngokuba nesikhungo sezinhlekelele esithobelayo futhi esisebenza kahle kakhulu.
Image: UGU Municipality
UMasipala uMsunduzi uhlonishwe ngokubambisana okuhle nobuholi bendabuko, uthole indondo yeBest Traditional Council in Coordinating Service Delivery at Traditional Authority Centre (TAC) emcimbini wama-2025 Municipal Excellence Awards obubanjwe uMnyango wezokuBusa ngokuBambisana neziNdaba zoMdabu KwaZulu-Natal (KZN COGTA).
Image: KZN COGTA
Umasipala waseMvoti uthole ukuhlonitshwa okuphezulu emiklomelweni kaMasipala waseKZN ngokuhlomula ngendondo yokuthola umbiko ongenagcobho nohlelo oluhle lwe-EPWP
Image: KZN Cogta
Umasipala waseNquthu uthole indondo yokuphathwa kahle kwephrojekthi yokuthuthukisa kwedolobha elincane nephrojekthi yokufakwa kwamalambu omgwaqo asebenza ngelanga nenye yokusetshenzwa ngendlela kwamaphrojekthi omphakathi.
Image: kzn cogta